tumhaari zat se mujhko lagaw hai ab tak

tumhārī zaat se mujh ko lagāv hai ab tak

tumhārī samt hī dil kā jhukāv hai ab tak

nadī meñ pyaar kī yaksāñ chaḌhāv hai ab tak

vahī hai shauq vahī dil meñ chaav hai ab tak

jo ek roz tirī be-ruḳhī ne baḳhshā thā

hamāre dil meñ salāmat vo ghaav hai ab tak

vo jis meñ pyaar kā ham ne safar kiyā thā kabhī

nadī kināre vo pyārī sī naav hai ab tak

kiyā thā va.ada jahāñ tum ne mujh se milne kā

usī maqām pe merā paḌāv hai ab tak

jo giit gaay the mil kar abhī haiñ yaad mujhe

mohabbatoñ kā vahī rakh-rakhāv hai ab tak

hamārā pyaar balī jin rivāyatoñ kī chaḌhā

mire samāj meñ vo bhed-bhāv hai ab tak

'sirāj' ham ko to us ne bhulā diyā lekin

hamāre dil meñ vafā kā alaav hai ab tak

tumhaari zat se mujh ko lagaw hai ab tak

tumhaari samt hi dil ka jhukaw hai ab tak

nadi mein pyar ki yaksan chaDhaw hai ab tak

wahi hai shauq wahi dil mein chaw hai ab tak

jo ek roz teri be-ruKHi ne baKHsha tha

hamare dil mein salamat wo ghaw hai ab tak

wo jis mein pyar ka hum ne safar kiya tha kabhi

nadi kinare wo pyari si naw hai ab tak

kiya tha wada jahan tum ne mujh se milne ka

usi maqam pe mera paDaw hai ab tak

jo git gay the mil kar abhi hain yaad mujhe

mohabbaton ka wahi rakh-rakhaw hai ab tak

hamara pyar bali jin riwayaton ki chaDha

mere samaj mein wo bhed-bhaw hai ab tak

'siraj' hum ko to us ne bhula diya lekin

hamare dil mein wafa ka alaw hai ab tak