tumhaari zulf ka ho kar asir zinda hai

tumhārī zulf kā ho kar asiir zinda hai

kisī tarah se sahī ye faqīr zinda hai

makān-e-hastī kā fard-e-amīr zinda hai

maiñ zinda huuñ abhī merā zamīr zinda hai

hamārī ḳhaak bas apnī jagah pe Thahregī

chale chalo ki abhī to ḳhamīr zinda hai

vo phuul ho gayā amn-o-amān kī ḳhātir

laḌo na shaiḳh-o-barahman kabīr zinda hai

taḌaptī zindagī aḳhbār ke varaq-ba-varaq

batā rahī haiñ ye ḳhabreñ mudīr zinda hai

bayān-e-maut ne baḳhshī hayāt kitnoñ ko

'anīs' baaqī hai ab tak 'dabīr' zinda hai

ġhazal ke jism ko marne na do to baat bane

ġhazal kī ruuh meñ ai 'badr' 'mīr' zinda hai

tumhaari zulf ka ho kar asir zinda hai

kisi tarah se sahi ye faqir zinda hai

makan-e-hasti ka fard-e-amir zinda hai

main zinda hun abhi mera zamir zinda hai

hamari KHak bas apni jagah pe Thahregi

chale chalo ki abhi to KHamir zinda hai

wo phul ho gaya amn-o-aman ki KHatir

laDo na shaiKH-o-barahman kabir zinda hai

taDapti zindagi aKHbar ke waraq-ba-waraq

bata rahi hain ye KHabren mudir zinda hai

bayan-e-maut ne baKHshi hayat kitnon ko

'anis' baqi hai ab tak 'dabir' zinda hai

ghazal ke jism ko marne na do to baat bane

ghazal ki ruh mein ai 'badr' 'mir' zinda hai