تمہیں ہمارے ہی دوستوں کی جو صف سے امداد مل رہی ہے

تمہیں ہمارے ہی دوستوں کی جو صف سے امداد مل رہی ہے

تبھی نشانہ خطا نہیں ہے ہدف سے امداد مل رہی ہے

تمہاری ان جھوٹی عظمتوں کو حقیقی عزت نہیں ملے گی

تمہاری دستار کی اکڑ کو کلف سے امداد مل رہی ہے

کبھی کوئی اپنے نرم ہاتھوں سے میرے اشکوں کو پونچھتا تھا

اور آج کل یہ قمیض کے گیلے کف سے امداد مل رہی ہے

ہم ایسے صحرا میں گانے والے کسی سے کیا سر ملا سکیں گے

تمھارے نغموں کی میٹھی لے کو تو دف سے امداد مل رہی ہے

تمہاری ہم سے زباں درازی تمہاری ہم کو یہ طعنہ بازی

ہمارے دشمن کو یہ تمہاری طرف سے امداد مل رہی ہے

غرور طاقت پہ کرنے والو ہمارا تم کیا بگاڑ لو گے

ہم اہل حق ہیں سو ہم کو نیرؔ نجف سے امداد مل رہی ہے