tumhein lagti hai duniya ajnabi kya

tumheñ lagtī hai duniyā ajnabī kyā

tabī.at ho ga.ī hai falsafī kyā

havas to hai azal se haath ḳhālī

bujhī bhī hai kisī kī tishnagī kyā

zarā sī bevafā.ī par ham us kī

bhalā toḌeñ marāsim bāhamī kyā

kahīñ takrār had se baḌh na jaa.e

kareñ is bahs ko ab multavī kyā

vo aaqil hai samajh legā ishāra

kareñ nādim use hai lāzmī kyā

buzurgoñ kī nasīhat nasl-e-nau ko

kaho to aaj lagtī hai bhalī kyā

unhīñ ke dam se the ghar meñ ujāle

baġhair un ke ho ghar meñ raushnī kyā

samajh paa.ī maiñ rahbar ke karam se

suḳhan kyā hai usūl-e-shā.irī kyā

valī haiñ 'nāzlī' vo mere murshid

muqābil un ke merī baat hī kyā

tumhein lagti hai duniya ajnabi kya

tabiat ho gai hai falsafi kya

hawas to hai azal se hath KHali

bujhi bhi hai kisi ki tishnagi kya

zara si bewafai par hum us ki

bhala toDen marasim bahami kya

kahin takrar had se baDh na jae

karen is bahs ko ab multawi kya

wo aaqil hai samajh lega ishaara

karen nadim use hai lazmi kya

buzurgon ki nasihat nasl-e-nau ko

kaho to aaj lagti hai bhali kya

unhin ke dam se the ghar mein ujale

baghair un ke ho ghar mein raushni kya

samajh pai main rahbar ke karam se

suKHan kya hai usul-e-shairi kya

wali hain 'nazli' wo mere murshid

muqabil un ke meri baat hi kya