tumhein pasand hai tanha safar ziyaada-tar

tumheñ pasand hai tanhā safar ziyāda-tar

yahī rahā mire pesh-e-nazar ziyāda-tar

gumāñ ki lauT ke aa jā.eñge kisī saa.at

usī gumāñ ne ujāḌe haiñ ghar ziyāda-tar

gurez ke koī lamhe bhī aa ga.e hoñge

tumhārī yaad rahī ham-safar ziyāda-tar

dikhā.ī detī haiñ kab ḳhud ko ḳhāmiyāñ apnī

fareb khātī hai apnī nazar ziyāda-tar

kahāñ maqām vo hotā hai sar jhukāne kā

vo jis maqām pe jhukte haiñ sar ziyāda-tar

ye e'tibār kī duniyā bhī ḳhuub duniyā hai

ki mo'atabar bhī hai nā-mo'tabar ziyāda-tar

'na.īm' kaam kiye kam hī kaam ke ham ne

abas guzāre haiñ shām-o-sahar ziyāda-tar

tumhein pasand hai tanha safar ziyaada-tar

yahi raha mere pesh-e-nazar ziyaada-tar

guman ki lauT ke aa jaenge kisi saat

usi guman ne ujaDe hain ghar ziyaada-tar

gurez ke koi lamhe bhi aa gae honge

tumhaari yaad rahi ham-safar ziyaada-tar

dikhai deti hain kab KHud ko KHamiyan apni

fareb khati hai apni nazar ziyaada-tar

kahan maqam wo hota hai sar jhukane ka

wo jis maqam pe jhukte hain sar ziyaada-tar

ye e'tibar ki duniya bhi KHub duniya hai

ki mo'atabar bhi hai na-mo'tabar ziyaada-tar

'naim' kaam kiye kam hi kaam ke hum ne

abas guzare hain sham-o-sahar ziyaada-tar