tumhein ye wahm ishaara tumari zat se tha

tumheñ ye vahm ishāra tumārī zaat se thā

ġhalat na samjho muḳhātib maiñ kā.enāt se thā

mujhe ye ranj savād-e-mushāhidāt se thā

javāz-e-jāñ bhī yahāñ marg-e-ḳhvāhishāt se thā

na ab vo jahl na dānishvarī kī bāteñ haiñ

ki husn-e-falsafa husn-e-tanāze’āt se thā

fasād-e-shahr na thā be-sabab ki rabt us kā

ma’āshiyāt se thā yā siyāsiyāt se thā

sahar ko bād-e-sabā ne mujhe bikher diyā

maiñ apnī ḳhaak sañbhāle hue to raat se thā

bachā havā se to dhūpoñ kī zad meñ aa ke girā

vo barg-e-sabz jo mausam kī bāqiyāt se thā

ta'ayyushāt meñ samjhā gayā use nāhaq

ta'alluq us kā hamārī zarūriyāt se thā

har ek shaḳhs ko thī ḳhvāhish-e-gazand vahāñ

ki us kā daar bhī jaise tabarrukāt se thā

vo mar gayā to ḳhudā ho gayā hazāroñ kā

vo shaḳhs apne hī jaisā thā jab hayāt se thā

'ra.ūf' ḳhair ta'alluq shurū' se apnā

jamāliyāt se thā husn-e-she'riyāt se thā

tumhein ye wahm ishaara tumari zat se tha

ghalat na samjho muKHatib main kaenat se tha

mujhe ye ranj sawad-e-mushahidat se tha

jawaz-e-jaan bhi yahan marg-e-KHwahishat se tha

na ab wo jahl na danishwari ki baaten hain

ki husn-e-falsafa husn-e-tanaze’at se tha

fasad-e-shahr na tha be-sabab ki rabt us ka

ma’ashiyat se tha ya siyasiyat se tha

sahar ko baad-e-saba ne mujhe bikher diya

main apni KHak sanbhaale hue to raat se tha

bacha hawa se to dhupon ki zad mein aa ke gira

wo barg-e-sabz jo mausam ki baqiyat se tha

ta'ayyushat mein samjha gaya use nahaq

ta'alluq us ka hamari zaruriyat se tha

har ek shaKHs ko thi KHwahish-e-gazand wahan

ki us ka dar bhi jaise tabarrukat se tha

wo mar gaya to KHuda ho gaya hazaron ka

wo shaKHs apne hi jaisa tha jab hayat se tha

'rauf' KHair ta'alluq shuru' se apna

jamaliyat se tha husn-e-she'riyat se tha