tumhin batao pukara hai bar bar kise

tumhīñ batāo pukārā hai baar baar kise

aziiz kahte haiñ ġham-hā-e-rozgār kise

sukūt-e-rāz kaho yā sukūt-e-majbūrī

magar laboñ kī jasārat thī nāgavār kise

ḳhizāñ meñ kis ne bahāroñ kī dilkashī bhar dī

duā.eñ detā hai dāman kā taar taar kise

kahāñ vo daaġh ki dil kā gumāñ kare koī

samjhiye ahd-e-tamannā kī yādgār kise

nasīm-e-sub.h kā ġhunchoñ ko intizār sahī

havā-e-dasht huuñ maiñ merā intizār kise

shaguftagī kā ishāra hai phuul barseñge

na jaane aaj navāze-gī shāḳh-e-dār kise

jarāhatoñ ke ḳhazāne luTā diye 'tābāñ'

kiyā hai raah ke kāñToñ ne itnā pyaar kise

tumhin batao pukara hai bar bar kise

aziz kahte hain gham-ha-e-rozgar kise

sukut-e-raaz kaho ya sukut-e-majburi

magar labon ki jasarat thi nagawar kise

KHizan mein kis ne bahaaron ki dilkashi bhar di

duaen deta hai daman ka tar tar kise

kahan wo dagh ki dil ka guman kare koi

samjhiye ahd-e-tamanna ki yaadgar kise

nasim-e-subh ka ghunchon ko intizar sahi

hawa-e-dasht hun main mera intizar kise

shaguftagi ka ishaara hai phul barsenge

na jaane aaj nawaze-gi shaKH-e-dar kise

jarahaton ke KHazane luTa diye 'taban'

kiya hai rah ke kanTon ne itna pyar kise