tumhin batao wo kaun hai jo har ek lamha sata raha hai

tumhīñ batāo vo kaun hai jo har ek lamha satā rahā hai

na niiñd rātoñ ko aa rahī hai na chain din ko hī aa rahā hai

ye ashk dāman bhigo rahe haiñ ye āñkheñ suujī huī haiñ merī

maiñ ek jalve kī us ke tālib magar vo parde girā rahā hai

tavāf-e-ka.aba ko dekh to le taḌap rahā hai vajūd merā

na paañv ab mere uTh rahe haiñ na sāmne ghar vo aa rahā hai

maiñ ek majbūr nā-tavāñ sī za.iif bandī huuñ us se tālib

tamāshā chup-chāp dekhtā hai kahāñ taras mujh pe khā rahā hai

tujhe usī kī qasam hai maulā hai tujh ko mahbūb do jahāñ meñ

vo apne jalve dikhā de mujh ko jo tū nazar se chhupā rahā hai

har ek tadbīr be-asar hai na jī rahī huuñ na mar rahī huuñ

junūn-e-ishq-e-ḳhudā hī logo ye haal merā banā rahā hai

tumhin batao wo kaun hai jo har ek lamha sata raha hai

na nind raaton ko aa rahi hai na chain din ko hi aa raha hai

ye ashk daman bhigo rahe hain ye aankhen suji hui hain meri

main ek jalwe ki us ke talib magar wo parde gira raha hai

tawaf-e-kaba ko dekh to le taDap raha hai wajud mera

na panw ab mere uTh rahe hain na samne ghar wo aa raha hai

main ek majbur na-tawan si zaif bandi hun us se talib

tamasha chup-chap dekhta hai kahan taras mujh pe kha raha hai

tujhe usi ki qasam hai maula hai tujh ko mahbub do jahan mein

wo apne jalwe dikha de mujh ko jo tu nazar se chhupa raha hai

har ek tadbir be-asar hai na ji rahi hun na mar rahi hun

junun-e-ishq-e-KHuda hi logo ye haal mera bana raha hai