تمہیں پوچھو گے گھبرا کر پتا جب ہم نہیں ہوں گے

تمہیں پوچھو گے گھبرا کر پتا جب ہم نہیں ہوں گے

ہر اک در پر ہمیں دو گے صدا جب ہم نہیں ہوں گے

ہمارے دم سے ساقی عظمت پیمانہ ہے باقی

بدل جائے گا نظم مے کدہ جب ہم نہیں ہوں گے

ابھی تک بد دعا دیتے رہے ہو تم ہمیں لیکن

ہمارے حق میں مانگو گے دعا جب ہم نہیں ہوں گے

ہمارے دم سے ہے رسم وفا باقی زمانے میں

بدل جائے گا انداز وفا جب ہم نہیں ہوں گے

ستم جتنے بھی چاہو آج تم جی کھول کر کر لو

کرو گے کس پہ کل جور و جفا جب ہم نہیں ہوں گے

تمہارے یہ حنائی ہاتھ ہو جائیں گے بے مصرف

کسے دست حنا دکھلاؤ گے جب ہم نہیں ہوں گے

ہمارے دم سے سر تا پا بنے ہو دیدنی لیکن

نظر آؤ گے پھر تم کیا سے کیا جب ہم نہیں ہوں گے

ابھی ملتے ہی نظریں ہم سے تم نظریں چراتے ہو

تمہیں ڈھونڈو گے ہم کو جا بہ جا جب ہم نہیں ہوں گے

ہماری موت کی اے فوقؔ جب ان کو خبر ہوگی

زباں پہ ان کی ہوگا اے خدا جب ہم نہیں ہوں گے