tund-KHu hawa bhi kab kaam kar saki tanha

tund-ḳhū havā bhī kab kaam kar sakī tanhā

āñdhiy.oñ meñ raushan hai sham-e-zindagī tanhā

saath saath chalte haiñ ġham rah-e-masarrat meñ

raas kis ko aayā hai lamha-e-ḳhushī tanhā

aur tez hotā hai vahshatoñ ke aalam meñ

kyā havā bujhā.egī raqs-e-sho.alagī tanhā

sub.h ke musāfir ko kaun rok saktā hai

rāsta banātā hai sail-e-raushnī tanhā

rah ga.e sabhī pīchhe zo.am-e-ḳhud-numā.ī meñ

kaam aa gayā apnā jazb-e-be-ḳhudī tanhā

jis jagah farishtoñ ke bhī qadam nahīñ pahuñche

le gayā mujhe merā zauq-e-āgahī tanhā

bulbuloñ ke naġhme the chaar sū jahāñ 'siddīq'

ḳhema-zan gulistāñ meñ ab hai ḳhāmushī tanhā

tund-KHu hawa bhi kab kaam kar saki tanha

aandhiyon mein raushan hai sham-e-zindagi tanha

sath sath chalte hain gham rah-e-masarrat mein

ras kis ko aaya hai lamha-e-KHushi tanha

aur tez hota hai wahshaton ke aalam mein

kya hawa bujhaegi raqs-e-shoalagi tanha

subh ke musafir ko kaun rok sakta hai

rasta banata hai sail-e-raushni tanha

rah gae sabhi pichhe zoam-e-KHud-numai mein

kaam aa gaya apna jazb-e-be-KHudi tanha

jis jagah farishton ke bhi qadam nahin pahunche

le gaya mujhe mera zauq-e-agahi tanha

bulbulon ke naghme the chaar su jahan 'siddiq'

KHema-zan gulistan mein ab hai KHamushi tanha