turbat pe wo jo aae to aalam naya hua

turbat pe vo jo aa.e to aalam nayā huā

phūloñ meñ jaan paḌ ga.ī sabza harā huā

dekhā gayā na ashkoñ kā dariyā baḌhā huā

paanī baras rahā thā ki qāsid havā huā

shāmat hai kis kī kaun ye pūchhe ki kyā huā

'safdar' ko jā rahā hai koī kostā huā

aa.e nikālne vo mire dil kī hasrateñ

aa.e ujāḌne ko mirā ghar basā huā

suntā huuñ be-naqāb vo aaj aa.e baam par

kyā jaane hashr dekhne vāloñ kā kyā huā

kyā kyā batā.ūñ bigḌe hue tevaroñ meñ hai

ġhusse meñ bhī hai pyaar kā naqsha khichā huā

hai aur rang-o-bū gul-e-āriz se aap ke

do phūloñ se hai gulshan-e-ālam basā huā

vaa.iz ko kyā huā hai ki tauba ke baad bhī

baiThā hai ḳhum kī tarah jo ham se bharā huā

aa aa ke jā chuke ka.ī mausam bahār ke

ab tak asīr-e-dām na koī rihā huā

hisse meñ aa gayā vahī sīmāb-o-barq ke

jo iztirāb thā mire dil se bachā huā

pūchhā kisī ne haal jo 'safdar' kā yuuñ kahā

zinda thā raat sub.h ko kyā jaane kyā huā

turbat pe wo jo aae to aalam naya hua

phulon mein jaan paD gai sabza hara hua

dekha gaya na ashkon ka dariya baDha hua

pani baras raha tha ki qasid hawa hua

shamat hai kis ki kaun ye puchhe ki kya hua

'safdar' ko ja raha hai koi kosta hua

aae nikalne wo mere dil ki hasraten

aae ujaDne ko mera ghar basa hua

sunta hun be-naqab wo aaj aae baam par

kya jaane hashr dekhne walon ka kya hua

kya kya bataun bigDe hue tewaron mein hai

ghusse mein bhi hai pyar ka naqsha khicha hua

hai aur rang-o-bu gul-e-ariz se aap ke

do phulon se hai gulshan-e-alam basa hua

waiz ko kya hua hai ki tauba ke baad bhi

baiTha hai KHum ki tarah jo hum se bhara hua

aa aa ke ja chuke kai mausam bahaar ke

ab tak asir-e-dam na koi riha hua

hisse mein aa gaya wahi simab-o-barq ke

jo iztirab tha mere dil se bacha hua

puchha kisi ne haal jo 'safdar' ka yun kaha

zinda tha raat subh ko kya jaane kya hua