tu aaj aaina-ru mujh pas aa ja

tū aaj ā.īna-rū mujh paas aa jā

bahar-sūrat mujhe sūrat dikhā jā

tū aa ai ātish-e-barq-e-ġham-e-yār

mirā ye ḳhirman-e-hastī jalā jā

mirī aatī hai bas niiñd aa.e to aap

ye apnī chashm-poshī dekhtā jā

mirī jaarī haiñ aañsū aah qāsid

shitābī kah ye us ko mājrā jā

likhā maiñ ne ye us yūsuf ko kal ḳhat

aziiā dilbarā nāzuk-mizājā

rakhī hai chaah terī aah betāb

qalaq is mere dil kā tū miTā jā

ḳhudā hī hai mirī kashtī kā hāfiz

ḳhudā ke vāste tū nāḳhudā jā

na sunvā ġhair kī bāteñ sun ai yaar

tire jo jī meñ aave tū sunā jā

vahī hai jā-ba-jā bejā nahīñ ye

bajā hai us kī hī har ek jā-jā

agar jaatā hai ai mere masīhā

ilaaj is dard-e-dil kā tū batā jā

mirī siina pe rakh dast-e-nigārīñ

mirī ye aag dil kī tū bujhā jā

agar baiThā hai nāseh muñh ko sī baiTh

vagarna yaañ se uTh ai be-hayā jā

tirī naubat hī 'ehsāñ' koī din yaañ

tū Dañkā ishq kā har jā bajā jā

tu aaj aaina-ru mujh pas aa ja

bahar-surat mujhe surat dikha ja

tu aa ai aatish-e-barq-e-gham-e-yar

mera ye KHirman-e-hasti jala ja

meri aati hai bas nind aae to aap

ye apni chashm-poshi dekhta ja

meri jari hain aansu aah qasid

shitabi kah ye us ko majra ja

likha main ne ye us yusuf ko kal KHat

azia dilbara nazuk-mizaja

rakhi hai chah teri aah betab

qalaq is mere dil ka tu miTa ja

KHuda hi hai meri kashti ka hafiz

KHuda ke waste tu naKHuda ja

na sunwa ghair ki baaten sun ai yar

tere jo ji mein aawe tu suna ja

wahi hai ja-ba-ja beja nahin ye

baja hai us ki hi har ek ja-ja

agar jata hai ai mere masiha

ilaj is dard-e-dil ka tu bata ja

meri sina pe rakh dast-e-nigarin

meri ye aag dil ki tu bujha ja

agar baiTha hai naseh munh ko si baiTh

wagarna yan se uTh ai be-haya ja

teri naubat hi 'ehsan' koi din yan

tu Danka ishq ka har ja baja ja