tu agar darmiyan nahin hota

tū agar darmiyāñ nahīñ hotā

'ishq kā imtihāñ nahīñ hotā

tere qadmoñ kī ḳhaak hotā maiñ

qālib-e-jism-o-jāñ nahīñ hotā

tujh se sab kuchh jo tū nahīñ hotā

kuchh bhī ai merī jaañ nahīñ hotā

jo karūñ nazr-e-jism jaan ki dil

tere shāyān-e-shāñ nahīñ hotā

baat kartā huuñ rū-barū tujh se

jab koī darmiyāñ nahīñ hotā

vasl kī aarzū na ho jis ko

hijr us par girāñ nahīñ hotā

muskurā to rahā huuñ mahfil meñ

par ġham-e-dil nihāñ nahīñ hotā

dard agar dard-e-'ishq nai hotā

vaj.h-e-taskīn-e-jāñ nahīñ hotā

lafz har-chand aa.ine haiñ magar

dil meñ jo hai 'ayāñ nahīñ hotā

chashm bhī boltī hai chehra bhī

lafz hī tarjumāñ nahīñ hotā

tu agar darmiyan nahin hota

'ishq ka imtihan nahin hota

tere qadmon ki KHak hota main

qalib-e-jism-o-jaan nahin hota

tujh se sab kuchh jo tu nahin hota

kuchh bhi ai meri jaan nahin hota

jo karun nazr-e-jism jaan ki dil

tere shayan-e-shan nahin hota

baat karta hun ru-baru tujh se

jab koi darmiyan nahin hota

wasl ki aarzu na ho jis ko

hijr us par giran nahin hota

muskura to raha hun mahfil mein

par gham-e-dil nihan nahin hota

dard agar dard-e-'ishq nai hota

wajh-e-taskin-e-jaan nahin hota

lafz har-chand aaine hain magar

dil mein jo hai 'ayan nahin hota

chashm bhi bolti hai chehra bhi

lafz hi tarjuman nahin hota