تو اگر دیکھے سادگی میری

تو اگر دیکھے سادگی میری

پھر طبیعت ہے شاعری میری

درد و غم میں وفا ملائی گئی

اور تخلیق کی گئی میری

مجھ کو اتنا بتاؤ سچ سچ تم

یاد آتی نہیں کبھی میری

ہر اندھیرا مٹا سکوں میں یہاں

دور تک جائے روشنی میری

اب بھی تجھ سے وفا نبھاؤں گی

اب بھی باقی ہے زندگی میری

کتنے دن سے ترا گزر نہ ہوا

کتنی ویراں ہوئی گلی میری

میں بھی شب میں فلک پہ ہوتی ہوں

کون دیکھے گا چاندنی میری

تیری سانسوں کی خوشبوؤں میں ہوں

تجھ کو ظاہر نہ ہو کمی میری

پھر اننیاؔ تجھے وہ یاد آیا

کہہ رہی آنکھوں کی نمی میری