tu agar mujhse juda ai but-e-nadan hoga

tū agar mujh se judā ai but-e-nādāñ hogā

misl-e-nāqūs ye dil hijr meñ nālāñ hogā

maujzan jabki mirā dīda-e-giryāñ hogā

ek aalam meñ bapā nuuh kā tūfāñ hogā

vo parī mere janāze ko jo kāñdhā degī

taḳhta tābūt kā aurang-e-sulaimāñ hogā

gul judā.ī meñ rahegā jo yuñhī pazhmurda

gul-e-turbat mujhe dāġh-e-ġham-e-hijrāñ hogā

khīñch lā.egī kabhī to kashish-e-ishq unheñ

guzar un kā bhī sū-e-gor-e-garībāñ hogā

tujh ko us mehr-laqā se hai jo ulfat 'shaidā'

dāġh-e-dil dekhnā rashk-e-mah-e-tābāñ hogā

tu agar mujh se juda ai but-e-nadan hoga

misl-e-naqus ye dil hijr mein nalan hoga

maujzan jabki mera dida-e-giryan hoga

ek aalam mein bapa nuh ka tufan hoga

wo pari mere janaze ko jo kandha degi

taKHta tabut ka aurang-e-sulaiman hoga

gul judai mein rahega jo yunhi pazhmurda

gul-e-turbat mujhe dagh-e-gham-e-hijran hoga

khinch laegi kabhi to kashish-e-ishq unhen

guzar un ka bhi su-e-gor-e-gariban hoga

tujh ko us mehr-laqa se hai jo ulfat 'shaida'

dagh-e-dil dekhna rashk-e-mah-e-taban hoga