tu agar phul hai KHush-rang faza hun main bhi

tū agar phuul hai ḳhush-rang fazā huuñ maiñ bhī

tū jo gulshan hai to phir mauj-e-sabā huuñ maiñ bhī

ye alag baat ki ab us kī zarūrat na rahī

tū ne māñgī thī ḳhudā se vo duā huuñ maiñ bhī

nabz-e-hastī kī bhī raftār ko pahchān zarā

dil dhaḌakne kī tire koī sadā huuñ maiñ bhī

aaj bhī apne kaf-e-dast pe tū ġhaur se dekh

phīkā phīkā hī sahī rang-e-hinā huuñ maiñ bhī

jis ke isrār pe pheñkī thī takalluf kī naqāb

ḳhalvat-e-shauq kī terī vo ḳhatā huuñ maiñ bhī

koī manzil to nahīñ rāheñ magar haiñ shāhid

ḳhud ko paane ke liye kitnā chalā huuñ maiñ bhī

kishvar-e-husn kā hai naaz agar vo ai 'nadīm'

mujh ko hai faḳhr ki taqdīs-e-vafā huuñ maiñ bhī

tu agar phul hai KHush-rang faza hun main bhi

tu jo gulshan hai to phir mauj-e-saba hun main bhi

ye alag baat ki ab us ki zarurat na rahi

tu ne mangi thi KHuda se wo dua hun main bhi

nabz-e-hasti ki bhi raftar ko pahchan zara

dil dhaDakne ki tere koi sada hun main bhi

aaj bhi apne kaf-e-dast pe tu ghaur se dekh

phika phika hi sahi rang-e-hina hun main bhi

jis ke israr pe phenki thi takalluf ki naqab

KHalwat-e-shauq ki teri wo KHata hun main bhi

koi manzil to nahin rahen magar hain shahid

KHud ko pane ke liye kitna chala hun main bhi

kishwar-e-husn ka hai naz agar wo ai 'nadim'

mujh ko hai faKHr ki taqdis-e-wafa hun main bhi