tu agar sham-e-mohabbat ko farozan kar de

tū agar sham-e-mohabbat ko farozāñ kar de

tīrgī zulm kī chaak apnā garebāñ kar de

dard kyā shai hai zamāne pe numāyāñ kar de

ġham kī har mauj se hañgāma-e-tūfāñ kar de

raushan is tarah se kar ilm-o-amal kī mash.al

kam-nigāhī ke añdhere meñ charāġhāñ kar de

dekhī jaatī nahīñ be-kaif fazā-e-gulshan

uTh na.e sar se ise ḳhuld-badāmāñ kar de

tez kar sho.ala-e-ehsās-e-amal ko apne

barq-e-maġhrūr ko angusht-ba-dandāñ kar de

kaañp uThtā hai jigar sun ke jafā ke qisse

ḳhatm afsāna-e-ḳhūñ-rezī-e-insāñ kar de

sīñch kar sub.h-o-masā ḳhūn-e-jigar se apne

tū jo chāhe to bayābāñ ko gulistāñ kar de

rah ke pāband-e-qafas nāla-o-fariyād na kar

azm-e-bebāk ko ġhārat-gar-e-zindāñ kar de

muzmahil ho ke na kar bazm-e-tamannā be-kaif

naġhma-zan shauq se phir tār-e-rag-e-jāñ kar de

dil meñ us kār-e-numāyāñ kī taḌap paidā kar

jo har ik fard ko millat kā nigahbāñ kar de

paikar-e-azm-e-musammam jo tū ho jaa.e 'azīz'

sar tire qadmoñ pe ḳham gardish-e-daurāñ kar de

tu agar sham-e-mohabbat ko farozan kar de

tirgi zulm ki chaak apna gareban kar de

dard kya shai hai zamane pe numayan kar de

gham ki har mauj se hangama-e-tufan kar de

raushan is tarah se kar ilm-o-amal ki mashal

kam-nigahi ke andhere mein charaghan kar de

dekhi jati nahin be-kaif faza-e-gulshan

uTh nae sar se ise KHuld-badaman kar de

tez kar shoala-e-ehsas-e-amal ko apne

barq-e-maghrur ko angusht-ba-dandan kar de

kanp uThta hai jigar sun ke jafa ke qisse

KHatm afsana-e-KHun-rezi-e-insan kar de

sinch kar subh-o-masa KHun-e-jigar se apne

tu jo chahe to bayaban ko gulistan kar de

rah ke paband-e-qafas nala-o-fariyaad na kar

azm-e-bebak ko ghaarat-gar-e-zindan kar de

muzmahil ho ke na kar bazm-e-tamanna be-kaif

naghma-zan shauq se phir tar-e-rag-e-jaan kar de

dil mein us kar-e-numayan ki taDap paida kar

jo har ek fard ko millat ka nigahban kar de

paikar-e-azm-e-musammam jo tu ho jae 'aziz'

sar tere qadmon pe KHam gardish-e-dauran kar de