tu apne hone ka har ek nishan sambhaal ke mil

tū apne hone kā har ik nishāñ sambhāl ke mil

yaqīñ sambhāl ke mil aur gumāñ sambhāl ke mil

ham apne baare kabhī mushta.il nahīñ hote

faqīr log haiñ ham se zabāñ sambhāl ke mil

vajūd-e-vāhima vīrāniyoñ meñ ghūmtā hai

ye be-karāñ hai to phir be-karāñ sambhāl ke mil

ye marhale haiñ ajab is liye samundar se

huā ko thaam ke mil bādbāñ sambhāl ke mil

agarche dost haiñ saare hī ās-pās magar

usuul ye hai ki tīr-o-kamāñ sambhāl ke mil

tū kaisī ġhair-yaqīnī fazā meñ miltā hai

koī to lamha kabhī darmiyāñ sambhāl ke mil

phir us ke ba.ad to shāyad rahe rahe na rahe

tamām umr kā sūd-o-ziyāñ sambhāl ke mil

tu apne hone ka har ek nishan sambhaal ke mil

yaqin sambhaal ke mil aur guman sambhaal ke mil

hum apne bare kabhi mushtail nahin hote

faqir log hain hum se zaban sambhaal ke mil

wajud-e-wahima viraniyon mein ghumta hai

ye be-karan hai to phir be-karan sambhaal ke mil

ye marhale hain ajab is liye samundar se

hua ko tham ke mil baadban sambhaal ke mil

agarche dost hain sare hi aas-pas magar

usul ye hai ki tir-o-kaman sambhaal ke mil

tu kaisi ghair-yaqini faza mein milta hai

koi to lamha kabhi darmiyan sambhaal ke mil

phir us ke baad to shayad rahe rahe na rahe

tamam umr ka sud-o-ziyan sambhaal ke mil