tu apne shahr-e-tarab se na puchh haal mera

tū apne shahr-e-tarab se na pūchh haal mirā

mujhe aziiz hai ye kūcha-e-malāl mirā

abhī to honā hai ik raqs-e-be-misāl mirā

diye kī lau se abhī dekhnā visāl mirā

vo dard huuñ koī chāra nahīñ hai jis kā kahīñ

vo zaḳhm huuñ ki hai dushvār indimāl mirā

to kyā ye vaqt yūñhī rauñdtā rahegā mujhe

Darātā rahtā hai mujh ko yahī savāl mirā

javāz rakhtā huuñ maiñ apne zinda hone kā

ki ek ḳhvāb se hai silsila bahāl mirā

havā kī dostī achchhī na dushmanī achchhī

charāġh pahle na thā ab hai ham-ḳhayāl mirā

maiñ aks ban ke isī se ubharnā chāhtā huuñ

so mere ā.ina-gar aa.ina ujaal mirā

lahū kī nazr huā ek ek ḳhvāb-e-numū

havā ke saath gayā ḳhema-e-ḳhayāl mirā

kabhī maiñ sho.ala thā ab sirf raakh huuñ 'aslam'

halāk kar ke rahā mujh ko ishti.āl mirā

tu apne shahr-e-tarab se na puchh haal mera

mujhe aziz hai ye kucha-e-malal mera

abhi to hona hai ek raqs-e-be-misal mera

diye ki lau se abhi dekhna visal mera

wo dard hun koi chaara nahin hai jis ka kahin

wo zaKHm hun ki hai dushwar indimal mera

to kya ye waqt yunhi raundta rahega mujhe

Daraata rahta hai mujh ko yahi sawal mera

jawaz rakhta hun main apne zinda hone ka

ki ek KHwab se hai silsila bahaal mera

hawa ki dosti achchhi na dushmani achchhi

charagh pahle na tha ab hai ham-KHayal mera

main aks ban ke isi se ubharna chahta hun

so mere aaina-gar aaina ujal mera

lahu ki nazr hua ek ek KHwab-e-numu

hawa ke sath gaya KHema-e-KHayal mera

kabhi main shoala tha ab sirf rakh hun 'aslam'

halak kar ke raha mujh ko ishtial mera