tu bhali baat se hi meri KHafa hota hai

tū bhalī baat se hī merī ḳhafā hotā hai

aah kyā chāhnā aisā hī burā hotā hai

tere abrū se mirā dil na chhuTegā hargiz

gosht nāḳhun se bhalā koī judā hotā hai

maiñ samajhtā huuñ tujhe ḳhuub tarah ai ayyār

tere is makr ke iḳhlās se kyā hotā hai

hai kaf-e-ḳhāk mirī bas-ki tab-e-ishq se garm

paañv vaañ jis kā paḌe ābla-pā hotā hai

dil mirā haath se jaatā hai karūñ kyā tadbīr

yaar muddat kā mirā haa.e judā hotā hai

rāhbar manzil-e-maqsūd ko darkār nahīñ

shauq-e-dil apnā hī yaañ rāh-numā hotā hai

ġhair harjā.ī mirā yaar liye jaatā hai

mujh pe 'tābāñ' ye sitam aaj baḌā hotā hai

tu bhali baat se hi meri KHafa hota hai

aah kya chahna aisa hi bura hota hai

tere abru se mera dil na chhuTega hargiz

gosht naKHun se bhala koi juda hota hai

main samajhta hun tujhe KHub tarah ai ayyar

tere is makr ke iKHlas se kya hota hai

hai kaf-e-KHak meri bas-ki tab-e-ishq se garm

panw wan jis ka paDe aabla-pa hota hai

dil mera hath se jata hai karun kya tadbir

yar muddat ka mera hae juda hota hai

rahbar manzil-e-maqsud ko darkar nahin

shauq-e-dil apna hi yan rah-numa hota hai

ghair harjai mera yar liye jata hai

mujh pe 'taban' ye sitam aaj baDa hota hai