tu bhi ab chhoD de sath ai gham-e-duniya mera
tu bhi ab chhoD de sath ai gham-e-duniya mera
Khalilur Rahman Azmi
MORE BYKhalilur Rahman Azmi
tū bhī ab chhoḌ de saath ai ġham-e-duniyā merā
merī bastī meñ nahīñ koī shanāsā merā
shab-e-ġham paar lagā de ye safīnā merā
sub.h hogī to utar jā.egā dariyā merā
mujh ko mālūm nahīñ naam hai ab kyā merā
DhūñDne vaale mujhe chhoḌ de pīchhā merā
maiñ ne dekhī nahīñ barsoñ se ḳhud apnī sūrat
mere ā.īne se rūThā hai sarāpā merā
tū bhī ḳhvāboñ meñ milī maiñ bhī dhuñdlakoñ meñ tujhe
zindagī dekh kabhī ġhaur se chehrā merā
ghar se niklā huuñ to ab duur kahīñ jaane de
rok ai gardish-e-ayyām na rastā merā
do qadam dauḌ ke āvāz-e-jaras baiTh ga.ī
chal paḌā maiñ to kahīñ paañv na Thahrā merā
mere dāman meñ rahī ḳhāk-e-ġharīb-ul-vatanī
rah gayā dekh ke muñh dāman-e-sahrā merā
tu bhi ab chhoD de sath ai gham-e-duniya mera
meri basti mein nahin koi shanasa mera
shab-e-gham par laga de ye safina mera
subh hogi to utar jaega dariya mera
mujh ko malum nahin nam hai ab kya mera
DhunDne wale mujhe chhoD de pichha mera
main ne dekhi nahin barson se KHud apni surat
mere aaine se ruTha hai sarapa mera
tu bhi KHwabon mein mili main bhi dhundlakon mein tujhe
zindagi dekh kabhi ghaur se chehra mera
ghar se nikla hun to ab dur kahin jaane de
rok ai gardish-e-ayyam na rasta mera
do qadam dauD ke aawaz-e-jaras baiTh gai
chal paDa main to kahin panw na Thahra mera
mere daman mein rahi KHak-e-gharib-ul-watani
rah gaya dekh ke munh daman-e-sahra mera
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
