تو بھی اپنا نہ ہوا اور خدا چھوڑ دیا

تو بھی اپنا نہ ہوا اور خدا چھوڑ دیا

سوچتا ہوں کہ ترے واسطے کیا چھوڑ دیا

تیرا در تیری گلی اور تو چھوڑا نہ گیا

ورنہ جس جس کو یہاں تو نے کہا چھوڑ دیا

اس ستم گر کی نگاہوں پہ بھروسہ تو نہیں

تو اگر کہتا ہے جا مان لیا چھوڑ دیا

سانس تازہ ہو مری اور کہیں حبس گھٹے

اس لیے آج ذرا دل کو کھلا چھوڑ دیا

زور بازو سے نہ بن پایا تو کہنے وہ لگا

مسئلہ تجھ پہ مرا میں نے خدا چھوڑ دیا

اب کے وحشت میں پکاروں گا مسیحا کوئی

جو کبھی لیتا تھا میں نام ترا چھوڑ دیا

ہجر سے جان چھڑانے کی سعی میں شوبیؔ

ایک کمرہ جو تھا آسیب زدہ چھوڑ دیا