tu bhi apna na hua aur KHuda chhoD diya

tū bhī apnā na huā aur ḳhudā chhoḌ diyā

sochtā huuñ ki tire vāste kyā chhoḌ diyā

terā dar terī galī aur tū chhoḌā na gayā

varna jis jis ko yahāñ tū ne kahā chhoḌ diyā

us sitamgar kī nigāhoñ pe bharosa to nahīñ

tū agar kahtā hai jā maan liyā chhoḌ diyā

saañs taaza ho mirī aur kahīñ habs ghaTe

is liye aaj zarā dil ko khulā chhoḌ diyā

zor baazū se na ban paayā to kahne vo lagā

mas.ala tujh pe mirā maiñ ne ḳhudā chhoḌ diyā

ab ke vahshat meñ pukārūñgā masīhā koī

jo kabhī letā thā maiñ naam tirā chhoḌ diyā

hijr se jaan chhuḌāne kī sa.ī meñ 'shobī'

ek kamra jo thā āseb-zada chhoḌ diyā

tu bhi apna na hua aur KHuda chhoD diya

sochta hun ki tere waste kya chhoD diya

tera dar teri gali aur tu chhoDa na gaya

warna jis jis ko yahan tu ne kaha chhoD diya

us sitamgar ki nigahon pe bharosa to nahin

tu agar kahta hai ja man liya chhoD diya

sans taza ho meri aur kahin habs ghaTe

is liye aaj zara dil ko khula chhoD diya

zor bazu se na ban paya to kahne wo laga

masala tujh pe mera main ne KHuda chhoD diya

ab ke wahshat mein pukarunga masiha koi

jo kabhi leta tha main nam tera chhoD diya

hijr se jaan chhuDane ki sai mein 'shobi'

ek kamra jo tha aaseb-zada chhoD diya