tu bhi ruKHsat ho raha hai dhup bhi Dhalne ko hai

tū bhī ruḳhsat ho rahā hai dhuup bhī Dhalne ko hai

mere andar ik charāġh-e-shām-e-ġham jalne ko hai

kab talak is hijr meñ āḳhir ko ronā chāhiye

aañkh bhī ḳhuuñ ho ga.ī dāman bhī ab galne ko hai

gulsitāñ meñ paḌ ga.ī hai rasm-e-tajsīm-e-bahār

apne chehre par har ik gul ḳhūn-e-dil malne ko hai

ajnabī sī sarzamīñ nā-āshnā se log haiñ

ek sūraj thā shanāsā vo bhī ab Dhalne ko hai

har na.ī manzil kī jānib sūrat-e-abr-e-ravāñ

mere hāthoñ se nikal kar merā dil chalne ko hai

shahr par tūfān se pahle kā sannāTā hai aaj

hādisa hone ko hai yā sāneha Talne ko hai

ik havā-e-tund aur hamrāh kuchh chiñgāriyāñ

ḳhaak sī uḌne ko hai aur aag sī jalne ko hai

sāmne hai niiñd kī lambī masāfat aaj shab

kārvān-e-anjum-o-mahtāb bhī chalne ko hai

tu bhi ruKHsat ho raha hai dhup bhi Dhalne ko hai

mere andar ek charagh-e-sham-e-gham jalne ko hai

kab talak is hijr mein aaKHir ko rona chahiye

aankh bhi KHun ho gai daman bhi ab galne ko hai

gulsitan mein paD gai hai rasm-e-tajsim-e-bahaar

apne chehre par har ek gul KHun-e-dil malne ko hai

ajnabi si sarzamin na-ashna se log hain

ek suraj tha shanasa wo bhi ab Dhalne ko hai

har nai manzil ki jaanib surat-e-abr-e-rawan

mere hathon se nikal kar mera dil chalne ko hai

shahr par tufan se pahle ka sannaTa hai aaj

hadisa hone ko hai ya saneha Talne ko hai

ek hawa-e-tund aur hamrah kuchh chingariyan

KHak si uDne ko hai aur aag si jalne ko hai

samne hai nind ki lambi masafat aaj shab

karwan-e-anjum-o-mahtab bhi chalne ko hai