tu ek nam hai magar sada-e-KHwab ki tarah

tū ek naam hai magar sadā-e-ḳhvāb kī tarah

maiñ ek harf huuñ magar nishān-e-āb kī tarah

mujhe samajh ki maiñ hī asl rāz-e-kā.enāt huuñ

dharā huuñ tere sāmne khulī kitāb kī tarah

maiñ koī giit huuñ magar sadā kī bandishoñ meñ huuñ

mire lahū meñ raag hai sam-e-azāb kī tarah

mirī panāh-gāh thī unhī ḳhalāoñ meñ kahīñ

maiñ sat.h-e-āb par rahā habāb-e-āb kī tarah

maiñ 'asġhar'-e-hazīñ kabhī kisī ke dostoñ meñ thā

vo din bhī mujh ko yaad haiñ ḳhayāl-e-ḳhvāb kī tarah

tu ek nam hai magar sada-e-KHwab ki tarah

main ek harf hun magar nishan-e-ab ki tarah

mujhe samajh ki main hi asl raaz-e-kaenat hun

dhara hun tere samne khuli kitab ki tarah

main koi git hun magar sada ki bandishon mein hun

mere lahu mein rag hai sam-e-azab ki tarah

meri panah-gah thi unhi KHalaon mein kahin

main sath-e-ab par raha habab-e-ab ki tarah

main 'asghar'-e-hazin kabhi kisi ke doston mein tha

wo din bhi mujh ko yaad hain KHayal-e-KHwab ki tarah