tu hai kis manzil mein tera bol khan hai dil ka Thaar

tū hai kis manzil meñ terā bol khaañ hai dil kā Thaar

dam tirā aatā hai khaañ suuñ bol khaañ jaatā hai bhaar

dam ke ta.iiñ būjhā so kahte is ke ta.iiñ insān hai

nahiñ to sūrat aadmī sīrat meñ hai misl-e-himār

maiñ kahtā so kaun hai aur tū samajhtā hai kise

kyuuñ abas maiñ tū meñ paḌ kar be-abas hotā hai ḳhvār

rāhbar hai kaun terā bol tū kis kā faqīr

faqr kā kyā hāsilā samjhā mujhe mat ho gañvār

āshiqāñ ke bazm meñ ik rañg ho ai bul-havas

mat kahā bulbul naman chauñDā phulā kar tājdār

bahar ke ġhavvās se mat bahs kar ai ḳhām-tab.a

nahiñ gayā hai umr meñ apne tū dariyā ke kanār

kaj-bahas aatā hai karne jañg jab ushshāq suuñ

jyuuñ ki tair-e-haft-rañgī ho gayā aa kar shikār

pūchhtā aayā huuñ jo kuchh svaal kā mere javāb

thartharātā hai abas sīmāb namne be-qarār

tā kahe lag jvaab tujh par faqr kā luqma harām

bazm-e-rindāñ suuñ nikal jā jald-tar ho kar farār

shor aur ġhauġhā abas kartā hai kyuuñ rañg kar libās

muñh uThā jaatā hai jyuuñ be-qaid shutr-e-be-mahār

ai 'alīmullāh' na kar kaj-bahas suuñ svaal o javāb

hāsilā tarfain nahiñ hotā ba-juz ġhauġhā pukār

tu hai kis manzil mein tera bol khan hai dil ka Thaar

dam tera aata hai khan sun bol khan jata hai bhaar

dam ke tain bujha so kahte is ke tain insan hai

nahin to surat aadmi sirat mein hai misl-e-himar

main kahta so kaun hai aur tu samajhta hai kise

kyun abas main tu mein paD kar be-abas hota hai KHwar

rahbar hai kaun tera bol tu kis ka faqir

faqr ka kya hasila samjha mujhe mat ho ganwar

aashiqan ke bazm mein ek rang ho ai bul-hawas

mat kaha bulbul naman chaunDa phula kar tajdar

bahar ke ghawwas se mat bahs kar ai KHam-taba

nahin gaya hai umr mein apne tu dariya ke kanar

kaj-bahas aata hai karne jang jab ushshaq sun

jyun ki tair-e-haft-rangi ho gaya aa kar shikar

puchhta aaya hun jo kuchh swal ka mere jawab

thartharaata hai abas simab namne be-qarar

ta kahe lag jwab tujh par faqr ka luqma haram

bazm-e-rindan sun nikal ja jald-tar ho kar farar

shor aur ghaugha abas karta hai kyun rang kar libas

munh uTha jata hai jyun be-qaid shutr-e-be-mahaar

ai 'alimullah' na kar kaj-bahas sun swal o jawab

hasila tarfain nahin hota ba-juz ghaugha pukar