tu humse mil to tujhko haal-e-dil apna suna Dalen

tū ham se mil to tujh ko hāl-e-dil apnā sunā Dāleñ

kahe to jaam meñ ḳhūn-e-jigar apnā milā Dāleñ

taras khā mujh pe aur vaqt-e-junūñ yuuñ na rulā mujh ko

vagarna āñsuoñ se apne terā ġham jalā Dāleñ

havāsoñ meñ hamāre us ko ab to zinda rahne de

kahīñ aisā na ho har lamha ḳhushiyāñ ham bhulā Dāleñ

badalne ke liye kyoñ rang tujh ko itnī ujlat hai

hameñ Dar hai nishān-e-misl terī ham miTā Dāleñ

jagā rakkhā hai nīñdoñ ko hamārī jaane barsoñ se

to ho saktā hai ḳhvāboñ ko hī tere ham sulā Dāleñ

sameTā hai tujhe ḳhud meñ hamesha phūloñ kī mānind

kahīñ aisā na ho zaḳhmoñ ko tere ham khilā Dāleñ

tu hum se mil to tujh ko haal-e-dil apna suna Dalen

kahe to jam mein KHun-e-jigar apna mila Dalen

taras kha mujh pe aur waqt-e-junun yun na rula mujh ko

wagarna aansuon se apne tera gham jala Dalen

hawason mein hamare us ko ab to zinda rahne de

kahin aisa na ho har lamha KHushiyan hum bhula Dalen

badalne ke liye kyon rang tujh ko itni ujlat hai

hamein Dar hai nishan-e-misl teri hum miTa Dalen

jaga rakkha hai nindon ko hamari jaane barson se

to ho sakta hai KHwabon ko hi tere hum sula Dalen

sameTa hai tujhe KHud mein hamesha phulon ki manind

kahin aisa na ho zaKHmon ko tere hum khila Dalen