tu hi insaf se kah jis ka KHafa yar rahe

tū hī insāf se kah jis kā ḳhafā yaar rahe

apne jiine se na kis tarah vo be-zār rahe

zaḳhm-e-dil chhīle kabhī aur kabhī zaḳhm-e-jigar

nāḳhun-e-dast-e-junūñ kab mire be-kār rahe

in jafāoñ kā maza tum ko chakhā deveñge

haañ agar zinda ham ai charḳh-e-jafākār rahe

mai-kade meñ hai baḌī ye hī muġhāñ kī piirī

ki bas us chashm-e-siyah-mast se hushyār rahe

jalte bhunte rahe ham bazm-e-butāñ meñ lekin

sham.a saañ us pe bhī sar dene ko tayyār rahe

yuuñ to kyā ḳhvāb meñ bhī yaar kā milnā mālūm

apne gar aah yahī tāla-e-bedār rahe

ek jā siine meñ un donoñ kā rahnā hai muhāl

yā ye dil hī rahe yā āh-e-sharar-bār rahe

us se dil ḳhaak ho ummīd-e-husūl-e-matlab

jis se ik bose pe sau tarah kī takrār rahe

le ke paikāñ se tire tiir batā to qātil

ḳhuun meñ Duube nahīñ kab tā lab-e-sofār rahe

jins-e-dil ātish-e-ulfat meñ jale jo chāhe

par kisī tarah tirī garmi-e-bāzār rahe

bāzi-e-ishq meñ chipke raho kyā ḳhaak kaheñ

ek dil rakhte the paas apne so baar rahe

aisā dam naak meñ aayā hai ki ham raazī haiñ

'aish' gar siine meñ is dil ke evaz ḳhaar rahe

tu hi insaf se kah jis ka KHafa yar rahe

apne jine se na kis tarah wo be-zar rahe

zaKHm-e-dil chhile kabhi aur kabhi zaKHm-e-jigar

naKHun-e-dast-e-junun kab mere be-kar rahe

in jafaon ka maza tum ko chakha dewenge

han agar zinda hum ai charKH-e-jafakar rahe

mai-kade mein hai baDi ye hi mughan ki piri

ki bas us chashm-e-siyah-mast se hushyar rahe

jalte bhunte rahe hum bazm-e-butan mein lekin

shama san us pe bhi sar dene ko tayyar rahe

yun to kya KHwab mein bhi yar ka milna malum

apne gar aah yahi tala-e-bedar rahe

ek ja sine mein un donon ka rahna hai muhaal

ya ye dil hi rahe ya aah-e-sharar-bar rahe

us se dil KHak ho ummid-e-husul-e-matlab

jis se ek bose pe sau tarah ki takrar rahe

le ke paikan se tere tir bata to qatil

KHun mein Dube nahin kab ta lab-e-sofar rahe

jins-e-dil aatish-e-ulfat mein jale jo chahe

par kisi tarah teri garmi-e-bazar rahe

bazi-e-ishq mein chipke raho kya KHak kahen

ek dil rakhte the pas apne so bar rahe

aisa dam nak mein aaya hai ki hum raazi hain

'aish' gar sine mein is dil ke ewaz KHar rahe