tu hi nahin gardish mein murakh gardish mein sansar bhi hai

tū hī nahīñ gardish meñ mūrakh gardish meñ sansār bhī hai

rogoñ se bharpūr hai duniyā rogoñ kī bhar-mār bhī hai

māh-vashoñ kī ulfat meñ kuchh jiit bhī hai kuchh haar bhī hai

dil kī bāteñ dil hī jaane dil ko hī āzār bhī hai

mashq-e-sitam kiije dil bhar kar hāzir huuñ har tarah se maiñ

chāhe jis se ghāyal kiije abrū bhī talvār bhī hai

ishq-e-haqīqī meñ marnā to ain-sa.ādat hai be-shak

kashti-e-dil Duube yā ubhre sāhil bhī mañjdhār bhī hai

husn-e-talab hai apnā apnā chāhe jise apnā liije

gulshan-e-hastī meñ sab kuchh hai phuul bhī hai aur ḳhaar bhī hai

ye duniyā ānī-jānī hai pyāre kaun hai kis kā miit

sab ko tū apnā samjhā hai koī tirā ġham-ḳhvār bhī hai

jaa.ez hai maz.hab meñ us ke fikr-e-suḳhan ke saath meñ va.az

'ḳhāvar' kī bābat mat pūchho zāhid bhī fan-kār bhī hai

tu hi nahin gardish mein murakh gardish mein sansar bhi hai

rogon se bharpur hai duniya rogon ki bhar-mar bhi hai

mah-washon ki ulfat mein kuchh jit bhi hai kuchh haar bhi hai

dil ki baaten dil hi jaane dil ko hi aazar bhi hai

mashq-e-sitam kije dil bhar kar hazir hun har tarah se main

chahe jis se ghayal kije abru bhi talwar bhi hai

ishq-e-haqiqi mein marna to ain-saadat hai be-shak

kashti-e-dil Dube ya ubhre sahil bhi manjdhaar bhi hai

husn-e-talab hai apna apna chahe jise apna lije

gulshan-e-hasti mein sab kuchh hai phul bhi hai aur KHar bhi hai

ye duniya aani-jaani hai pyare kaun hai kis ka mit

sab ko tu apna samjha hai koi tera gham-KHwar bhi hai

jaez hai mazhab mein us ke fikr-e-suKHan ke sath mein waz

'KHawar' ki babat mat puchho zahid bhi fan-kar bhi hai