tu jaanta bhi hai is kahani ka kya banega

tū jāntā bhī hai is kahānī kā kyā banegā

tirī aqīdat se sang-reza ḳhudā banegā

ise malūñgā to merī miTTī chamak uThegī

ye phuul us ke laboñ ko chhū kar duā banegā

ham itnī raġhbat se us kī āñkhoñ ko dekhte haiñ

ḳhudā-na-karda ye shauq baḌh kar nasha banegā

tire banā.e hasīn chehroñ se zaḳhm khāte

ḳhudāyā tere nahīf bandoñ kā kyā banegā

ham ek sho.ale kī dastaras meñ bhaḌak rahe haiñ

ab aage aage hamārā dil bhī diyā banegā

ye lamha jis meñ ham aaj chhup kar gale mile haiñ

agar muqaddar nahīñ milā to sazā banegā

maiñ do qabīloñ kī dushmanī ko miTā rahā huuñ

hamārī shādī se ik nayā silsila banegā

tu jaanta bhi hai is kahani ka kya banega

teri aqidat se sang-reza KHuda banega

ise malunga to meri miTTi chamak uThegi

ye phul us ke labon ko chhu kar dua banega

hum itni raghbat se us ki aankhon ko dekhte hain

KHuda-na-karda ye shauq baDh kar nasha banega

tere banae hasin chehron se zaKHm khate

KHudaya tere nahif bandon ka kya banega

hum ek shoale ki dastaras mein bhaDak rahe hain

ab aage aage hamara dil bhi diya banega

ye lamha jis mein hum aaj chhup kar gale mile hain

agar muqaddar nahin mila to saza banega

main do qabilon ki dushmani ko miTa raha hun

hamari shadi se ek naya silsila banega