تو جانتا بھی ہے اس کہانی کا کیا بنے گا

تو جانتا بھی ہے اس کہانی کا کیا بنے گا

تری عقیدت سے سنگ ریزہ خدا بنے گا

اسے ملوں گا تو میری مٹی چمک اٹھے گی

یہ پھول اس کے لبوں کو چھو کر دعا بنے گا

ہم اتنی رغبت سے اس کی آنکھوں کو دیکھتے ہیں

خدا نہ کردہ یہ شوق بڑھ کر نشہ بنے گا

ترے بنائے حسین چہروں سے زخم کھاتے

خدایا تیرے نحیف بندوں کا کیا بنے گا

ہم ایک شعلے کی دسترس میں بھڑک رہے ہیں

اب آگے آگے ہمارا دل بھی دیا بنے گا

یہ لمحہ جس میں ہم آج چھپ کر گلے ملے ہیں

اگر مقدر نہیں ملا تو سزا بنے گا

میں دو قبیلوں کی دشمنی کو مٹا رہا ہوں

ہماری شادی سے اک نیا سلسلہ بنے گا