tu jaanta hai tere jaan-nisar hain hum log

tū jāntā hai tire jāñ-nisār haiñ ham log

rah-e-vafā meñ magar sangsār haiñ ham log

hamāre azm haiñ mīloñ ke pattharoñ kī tarah

tirā nishān tirī rahguzār haiñ ham log

farishte mahv-e-ta.ajjub haiñ aaj tak jin par

ḳhirad kī zad meñ vahī shāhkār haiñ ham log

azal ko khīñch ke le jā.eñge qayāmat tak

tire karam se abhī pā.edār haiñ ham log

hamāre zabt se qaa.em hai dostī kī ravish

na aazmā ki tire ġham-gusār haiñ ham log

mizāj-e-husn samajh kar bhī ishq kar baiThe

ḳhud apne zaḳhm ke parvardigār haiñ ham log

qarīb-tar hai rag-e-jāñ se bhī vahī 'anvar'

azal se jis ke liye be-qarār haiñ ham log

tu jaanta hai tere jaan-nisar hain hum log

rah-e-wafa mein magar sangsar hain hum log

hamare azm hain milon ke pattharon ki tarah

tera nishan teri rahguzar hain hum log

farishte mahw-e-tajjub hain aaj tak jin par

KHirad ki zad mein wahi shahkar hain hum log

azal ko khinch ke le jaenge qayamat tak

tere karam se abhi paedar hain hum log

hamare zabt se qaem hai dosti ki rawish

na aazma ki tere gham-gusar hain hum log

mizaj-e-husn samajh kar bhi ishq kar baiThe

KHud apne zaKHm ke parwardigar hain hum log

qarib-tar hai rag-e-jaan se bhi wahi 'anwar'

azal se jis ke liye be-qarar hain hum log