تو جانتا نہیں کہ وہ وقت زوال تھا

تو جانتا نہیں کہ وہ وقت زوال تھا

آنکھوں کا رنگ کرب سے جس وقت لال تھا

دنیا کے سب حسین یہی سوچتے رہے

کس کی نظر کا نور تھا کس کا جمال تھا

مجھ سے بچھڑ کے حوصلے اس کے بھی پست تھے

یہ کار گاہ عشق میں پہلا ملال تھا

دیکھا تجھے تو نور کی کرنیں امڈ پڑیں

اس دشت میں ازل سے چراغوں کا کال تھا

مصروفیت میں بیٹوں سے برسی نہ ہو سکی

گزرے ابھی تو باپ کو پہلا ہی سال تھا

اس فاقہ کش کو فقر کی تعلیم دیجئے

چہرے پہ جس کے رعب نہ جاہ و جلال تھا

میں نے کسی کا ہجر کمایا تھا رات دن

اب خرچ کر رہا ہوں جو رزق حلال تھا