tu jaanta nahin ki wo waqt-e-zawal tha

tū jāntā nahīñ ki vo vaqt-e-zavāl thā

āñkhoñ kā rang karb se jis vaqt laal thā

duniyā ke sab hasīn yahī sochte rahe

kis kī nazar kā nuur thā kis kā jamāl thā

mujh se bichhaḌ ke hausle us ke bhī past the

ye kār-gāh-e-ishq meñ pahlā malāl thā

dekhā tujhe to nuur kī kirneñ umaD paḌīñ

is dasht meñ azal se charāġhoñ kā kaal thā

masrūfiyat meñ beToñ se barsī na ho sakī

guzre abhī to baap ko pahlā hī saal thā

us fāqa-kash ko faqr kī ta.alīm dījiye

chehre pe jis ke ro.ab na jāh-o-jalāl thā

maiñ ne kisī kā hijr kamāyā thā rāt-din

ab ḳharch kar rahā huuñ jo rizq-e-halāl thā

tu jaanta nahin ki wo waqt-e-zawal tha

aankhon ka rang karb se jis waqt lal tha

duniya ke sab hasin yahi sochte rahe

kis ki nazar ka nur tha kis ka jamal tha

mujh se bichhaD ke hausle us ke bhi past the

ye kar-gah-e-ishq mein pahla malal tha

dekha tujhe to nur ki kirnen umaD paDin

is dasht mein azal se charaghon ka kal tha

masrufiyat mein beTon se barsi na ho saki

guzre abhi to bap ko pahla hi sal tha

us faqa-kash ko faqr ki talim dijiye

chehre pe jis ke roab na jah-o-jalal tha

main ne kisi ka hijr kamaya tha raat-din

ab KHarch kar raha hun jo rizq-e-halal tha