تو جب آنکھوں کے دائرے میں نہیں

تو جب آنکھوں کے دائرے میں نہیں

روشنی پھر کسی دیے میں نہیں

درد ہی درد ہے نہاں اس میں

اور کچھ بھی تو قہقہے میں نہیں

ربط جس سے تھا زندگی جیسا

اب وہی میرے رابطے میں نہیں

ہم کو کاغذ پہ وہ اتارے گا

ہم تو وہ ہیں جو حاشیے میں نہیں

شکل سے جانتا ہوں میں لیکن

آپ کا نام حافظے میں نہیں

دیکھ کر پر فتن شباب ترا

کون آئے گا وسوسے میں نہیں

ہوں وہاں پر کہ ہم سفر تو کجا

غیر بھی کوئی راستے میں نہیں

میں جو ہوں تم وہی اتارو بس

مسکراؤں گا کیمرے میں نہیں