tu jab aankhon ke daere mein nahin

tū jab āñkhoñ ke dā.ere meñ nahīñ

raushnī phir kisī diye meñ nahīñ

dard hī dard hai nihāñ is meñ

aur kuchh bhī to qahqahe meñ nahīñ

rabt jis se thā zindagī jaisā

ab vahī mere rābte meñ nahīñ

ham ko kāġhaz pe vo utāregā

ham to vo haiñ jo hāshiye meñ nahīñ

shakl se jāntā huuñ maiñ lekin

aap kā naam hāfize meñ nahīñ

dekh kar pur-fitan shabāb tirā

kaun aa.egā vasvase meñ nahīñ

huuñ vahāñ par ki ham-safar to kujā

ġhair bhī koī rāste meñ nahīñ

maiñ jo huuñ tum vahī utāro bas

muskurā.ūñgā camere meñ nahīñ

tu jab aankhon ke daere mein nahin

raushni phir kisi diye mein nahin

dard hi dard hai nihan is mein

aur kuchh bhi to qahqahe mein nahin

rabt jis se tha zindagi jaisa

ab wahi mere rabte mein nahin

hum ko kaghaz pe wo utarega

hum to wo hain jo hashiye mein nahin

shakl se jaanta hun main lekin

aap ka nam hafize mein nahin

dekh kar pur-fitan shabab tera

kaun aaega waswase mein nahin

hun wahan par ki ham-safar to kuja

ghair bhi koi raste mein nahin

main jo hun tum wahi utaro bas

muskuraunga camere mein nahin