tu juda hua jo mujhse mere KHwab jal gae the

tū judā huā jo mujh se mire ḳhvāb jal ga.e the

mirī raat bujh ga.ī thī ki diye badal ga.e the

tire lams kī badaulat mire jism-o-jāñ the raushan

tirī zaat ke ujāle mire dil meñ Dhal ga.e the

jahāñ zindagī luTī hai jahāñ dafn hai tamanna

usī sang-dil galī meñ yūñhī kal nikal ga.e the

tujhe sochne kā lamha koī phuul jaise mahke

tirī yaad jaise ghar meñ ka.ī diip jal ga.e the

mujhe yaad hai abhī tak vo tapish tire laboñ kī

unheñ jab chhuā thā maiñ ne mire haath jal ga.e the

vahī rahguzar thī ġhā.eb bhalā kaise lauT paate

tirī justujū meñ jānāñ jahāñ ham nikal ga.e the

tu juda hua jo mujh se mere KHwab jal gae the

meri raat bujh gai thi ki diye badal gae the

tere lams ki badaulat mere jism-o-jaan the raushan

teri zat ke ujale mere dil mein Dhal gae the

jahan zindagi luTi hai jahan dafn hai tamanna

usi sang-dil gali mein yunhi kal nikal gae the

tujhe sochne ka lamha koi phul jaise mahke

teri yaad jaise ghar mein kai dip jal gae the

mujhe yaad hai abhi tak wo tapish tere labon ki

unhen jab chhua tha main ne mere hath jal gae the

wahi rahguzar thi ghaeb bhala kaise lauT pate

teri justuju mein jaanan jahan hum nikal gae the