tu kahta hai tujhe matlab nahin tha

tū kahtā hai tujhe matlab nahīñ thā

vafā kā paas mujh ko kab nahīñ thā

ye tarka bhā.iyoñ meñ bāñTte tum

tumhāre naam sab kā sab nahīñ thā

miyāñ rone kī maiñ ne mashq kī thī

bahut āsān ye kartab nahīñ thā

hamārī guftugū hotī thī aksar

hamāre saath vo jab jab nahīñ thā

to kyā pahle kī saarī laḌkiyoñ ko

zamāne kī ravish kā Dhab nahīñ thā

ye fashion jo hai ab ‘uryāniyat kā

nahīñ thā bhaa.ī mere tab nahīñ thā

faqat sīkhā hai ham ne tajraboñ se

hamāre vāste maktab nahīñ thā

vo jis ke saath kal maiñ ne bahut pī

vo maikash merā ham-mashrab nahīñ thā

khulegā raaz ye āḳhir meñ 'ishrat'

ḳhudā kā koī bhī maz.hab nahīñ thā

tu kahta hai tujhe matlab nahin tha

wafa ka pas mujh ko kab nahin tha

ye tarka bhaiyon mein banTte tum

tumhaare nam sab ka sab nahin tha

miyan rone ki main ne mashq ki thi

bahut aasan ye kartab nahin tha

hamari guftugu hoti thi aksar

hamare sath wo jab jab nahin tha

to kya pahle ki sari laDkiyon ko

zamane ki rawish ka Dhab nahin tha

ye fashion jo hai ab ‘uryaniyat ka

nahin tha bhai mere tab nahin tha

faqat sikha hai hum ne tajrabon se

hamare waste maktab nahin tha

wo jis ke sath kal main ne bahut pi

wo maikash mera ham-mashrab nahin tha

khulega raaz ye aaKHir mein 'ishrat'

KHuda ka koi bhi mazhab nahin tha