تو کہتا ہے تجھے مطلب نہیں تھا

تو کہتا ہے تجھے مطلب نہیں تھا

وفا کا پاس مجھ کو کب نہیں تھا

یہ ترکہ بھائیوں میں بانٹتے تم

تمہارے نام سب کا سب نہیں تھا

میاں رونے کی میں نے مشق کی تھی

بہت آسان یہ کرتب نہیں تھا

ہماری گفتگو ہوتی تھی اکثر

ہمارے ساتھ وہ جب جب نہیں تھا

تو کیا پہلے کی ساری لڑکیوں کو

زمانہ کی روش کا ڈھب نہیں تھا

یہ فیشن جو ہے اب عریانیت کا

نہیں تھا بھائی میرے تب نہیں تھا

فقط سیکھا ہے ہم نے تجربوں سے

ہمارے واسطے مکتب نہیں تھا

وہ جس کے ساتھ کل میں نے بہت پی

وہ میکش میرا ہم مشرب نہیں تھا

کھلے گا راز یہ آخر میں عشرتؔ

خدا کا کوئی بھی مذہب نہیں تھا