tu KHud kahan hai qafila-e-salar dekhna

tū ḳhud kahāñ hai qāfila-e-sālār dekhnā

ab ham kahāñ haiñ ālam-e-raftār dekhnā

ham chal paḌe haiñ manzil-e-maqsūd ke liye

ab sañg dekhnā hai na dīvār dekhnā

taz.īn-e-gulsitāñ se nahīñ vāsta jinheñ

un ke gharoñ meñ phuul ke ambār dekhnā

jab izn-e-arz-e-hāl diyā hai to chup raho

ab nāravā hai talḳhī-e-guftār dekhnā

ai bāġhbāñ na dekh hiqārat se is tarah

jab ham na hoñ to ālam-e-gulzār dekhnā

aa.e to koī mārka-e-hashr sāmne

ahl-e-junūñ kā jazba-e-īsār dekhnā

adnā samajh rahe ho hamārī bisāt ko

yaaro sabāt-e-azm sar-e-dār dekhnā

sau baar maiñ ne un ko pukārā hai ai 'nasīr'

guzrā bahut garāñ unheñ ik baar dekhnā

tu KHud kahan hai qafila-e-salar dekhna

ab hum kahan hain aalam-e-raftar dekhna

hum chal paDe hain manzil-e-maqsud ke liye

ab sang dekhna hai na diwar dekhna

tazin-e-gulsitan se nahin wasta jinhen

un ke gharon mein phul ke ambar dekhna

jab izn-e-arz-e-haal diya hai to chup raho

ab narawa hai talKHi-e-guftar dekhna

ai baghban na dekh hiqarat se is tarah

jab hum na hon to aalam-e-gulzar dekhna

aae to koi marka-e-hashr samne

ahl-e-junun ka jazba-e-isar dekhna

adna samajh rahe ho hamari bisat ko

yaro sabaat-e-azm sar-e-dar dekhna

sau bar main ne un ko pukara hai ai 'nasir'

guzra bahut garan unhen ek bar dekhna