tu kisi phul ko na Khaar ko dekh

tū kisī phuul ko na ḳhaar ko dekh

aks-e-ā.īna-e-bahār ko dekh

sīna-e-sang meñ jo raah kare

ḳhāk-ālūd is sharār ko dekh

khol kar bādbān-e-kashtī-e-shauq

satvat-e-bahr-e-be-kanār ko dekh

dostoñ meñ talāsh kar ḳhud ko

aur phir apne e.atibār ko dekh

jis meñ tū kho gayā hai dīvāne

ilm-o-hikmat ke us dayār ko dekh

vādī-e-gul se be-niyāz guzar

dasht-o-sahrā ke intizār ko dekh

tu kisi phul ko na KHar ko dekh

aks-e-aina-e-bahaar ko dekh

sina-e-sang mein jo rah kare

KHak-alud is sharar ko dekh

khol kar baadban-e-kashti-e-shauq

satwat-e-bahr-e-be-kanar ko dekh

doston mein talash kar KHud ko

aur phir apne eatibar ko dekh

jis mein tu kho gaya hai diwane

ilm-o-hikmat ke us dayar ko dekh

wadi-e-gul se be-niyaz guzar

dasht-o-sahra ke intizar ko dekh