تو لفظ لفظ بن مرے شعر و سخن میں آ

تو لفظ لفظ بن مرے شعر و سخن میں آ

ماہ درخشاں جان غزل فکر و فن میں آ

بدلی سے چھن کے آتی ہو جیسے کرن میں دھوپ

تو خواب پیرہن سی سجی میرے من میں آ

کچھ حسن و عشق کی بھی کشش روبرو جو ہو

حسن نظر اے جان وفا آ چمن میں آ

تنہائی تیری بھی تجھے کر دے گی زار زار

ویرانی لے کے اپنی مرے سونے پن میں آ

ہر اک جنوں کو حد سے گزرنے کا داؤں دے

جان و جگر میں آ کبھی دار و رسن میں آ

احساس تیرا گل کی کسی پنکھڑی سا ہے

اے گل بدن کبھی تو مری انجمن میں آ

ٹوٹے ہوئے یہ حوصلے ہیں مرحلے بھی ہیں

چھونے کو روح میرے بدن کی تھکن میں آ

باتیں وفا کی کرتا ہے تو غیر سا لگے

پیماں شکن ہو یار ذرا بانکپن میں آ