tu mere dard ko duniya nai nai dena

tū mere dard ko duniyā na.ī na.ī denā

mire ḳhudā mujhe kuchh aur āgahī denā

jo hasrateñ hī mirī zindagī kā hāsil haiñ

tū hasratoñ ke añdheroñ ko zindagī denā

jo tū ne apne karam se diyā hai apnoñ ko

mirī mizha ko un ashkoñ kī bhī namī denā

ye ġham-kada to sañvartā rahā hai barsoñ se

use jo raas na aa.e vahī ḳhushī denā

maiñ tujh se kuchh bhī nahīñ māñgtā mire mālik

mire qalam ko mire ḳhuuñ kī chāshnī denā

jahāñ se dil ko bachā kar maiñ tujh talak lā.ūñ

vahīñ pe siine meñ neze kī ik anī denā

'matīn' terā nahīñ hai to aur kis kā hai

bahisht denā to dozaḳh kī aag bhī denā

tu mere dard ko duniya nai nai dena

mere KHuda mujhe kuchh aur aagahi dena

jo hasraten hi meri zindagi ka hasil hain

tu hasraton ke andheron ko zindagi dena

jo tu ne apne karam se diya hai apnon ko

meri mizha ko un ashkon ki bhi nami dena

ye gham-kada to sanwarta raha hai barson se

use jo ras na aae wahi KHushi dena

main tujh se kuchh bhi nahin mangta mere malik

mere qalam ko mere KHun ki chashni dena

jahan se dil ko bacha kar main tujh talak laun

wahin pe sine mein neze ki ek ani dena

'matin' tera nahin hai to aur kis ka hai

bahisht dena to dozaKH ki aag bhi dena