tu misl-e-hur rashk-e-surayya tera badan

tū misl-e-hūr rashk-e-surayyā tirā badan

lagtā hai jaise chāñd kā haala tirā badan

kyā gul khilā.e jān-e-tamannā tirā badan

qudrat ne kitnā shoḳh banāyā tirā badan

kākul ghaTāoñ jaise haiñ lab gul ke misl haiñ

shabnam kabhī havā kabhī sho'la tirā badan

āñkheñ haiñ terī jaise chhupāyā ho mai-kada

sāġhar subū surāhī yā miinā tirā badan

hotā na zindagī meñ fidā phir vo hiir par

ik baar dekh letā jo rāñjhā tirā badan

pahlū hameñ ġhazal ke liye baḳhsh hī gayā

jab bhī tasavvurāt meñ aayā tirā badan

'faisal' tirī adāoñ pe qurbān ho gayā

chandan sā jab ki sāmne dekhā tirā badan

tu misl-e-hur rashk-e-surayya tera badan

lagta hai jaise chand ka haala tera badan

kya gul khilae jaan-e-tamanna tera badan

qudrat ne kitna shoKH banaya tera badan

kakul ghaTaon jaise hain lab gul ke misl hain

shabnam kabhi hawa kabhi sho'la tera badan

aankhen hain teri jaise chhupaya ho mai-kada

saghar subu surahi ya mina tera badan

hota na zindagi mein fida phir wo hir par

ek bar dekh leta jo ranjha tera badan

pahlu hamein ghazal ke liye baKHsh hi gaya

jab bhi tasawwuraat mein aaya tera badan

'faisal' teri adaon pe qurban ho gaya

chandan sa jab ki samne dekha tera badan