تو مثل حور رشک ثریا ترا بدن

تو مثل حور رشک ثریا ترا بدن

لگتا ہے جیسے چاند کا ہالہ ترا بدن

کیا گل کھلائے جان تمنا ترا بدن

قدرت نے کتنا شوخ بنایا ترا بدن

کاکل گھٹاؤں جیسے ہیں لب گل کے مثل ہیں

شبنم کبھی ہوا کبھی شعلہ ترا بدن

آنکھیں ہیں تیری جیسے چھپایا ہو میکدہ

ساغر سبو صراحی یا مینا ترا بدن

ہوتا نہ زندگی میں فدا پھر وہ ہیر پر

اک بار دیکھ لیتا جو رانجھا ترا بدن

پہلو ہمیں غزل کے لیے بخش ہی گیا

جب بھی تصورات میں آیا ترا بدن

فیصلؔ تری اداؤں پہ قربان ہو گیا

چندن سا جب کہ سامنے دیکھا ترا بدن