tu mujhko mere nam se pahchan ki main hun

tū mujh ko mire naam se pahchān ki maiñ huuñ

chhoTā hī sahī mujh ko magar maan ki maiñ huuñ

ik umr isī shahr meñ guzrī hai tire saath

ab kis liye bantā hai tū anjān ki maiñ huuñ

ye jeb bhī merī hai ye bāzār bhī merā

kar detā huuñ maiñ apnā hī nuqsān ki maiñ huuñ

ho jā.egā ik roz ye elaan ki maiñ thā

ab kartā huuñ ḳhud apnā hī elaan ki maiñ huuñ

ik sabza-e-naurasta huuñ bargad to nahīñ maiñ

tū kis liye hai itnā pareshān ki maiñ huuñ

is hijr sarā.e meñ huuñ do chaar hī din ab

thoḌā sā hī lā de mujhe sāmān ki maiñ huuñ

tu mujh ko mere nam se pahchan ki main hun

chhoTa hi sahi mujh ko magar man ki main hun

ek umr isi shahr mein guzri hai tere sath

ab kis liye banta hai tu anjaan ki main hun

ye jeb bhi meri hai ye bazar bhi mera

kar deta hun main apna hi nuqsan ki main hun

ho jaega ek roz ye elan ki main tha

ab karta hun KHud apna hi elan ki main hun

ek sabza-e-naurasta hun bargad to nahin main

tu kis liye hai itna pareshan ki main hun

is hijr sarae mein hun do chaar hi din ab

thoDa sa hi la de mujhe saman ki main hun