tu mutmain hai to aaKHir ye haal kaisa hai

tū mutma.in hai to āḳhir ye haal kaisā hai

zabān chup hai nazar meñ savāl kaisā hai

tamām shahr meñ ḳhushiyāñ luTāne nikle the

tumhāre chehre pe rang-e-malāl kaisā hai

chalī ga.ī hai masarrat to muskurāhaT kyoñ

utar chukī hai nadī to ubaal kaisā hai

yahāñ sabhī ko sabhī se aqīdateñ haiñ bahut

qadam qadam pe ye sāzish kā jaal kaisā hai

kisī ne ḳhuun kī holī agar nahīñ khelī

to har taraf ye lahū kā gulāl kaisā hai

rafū-garī kiyā karte haiñ nok-e-ḳhanjar se

hamāre zaḳhm kā un ko ḳhayāl kaisā hai

qarīb rahtā hai kartā nahīñ hai ram lekin

pakaḌ meñ aatā nahīñ vo ġhazāl kaisā hai

'zafar' isī ko urūj-o-zavāl kahte haiñ

jo sar buland thā vo pā.emāl kaisā hai

tu mutmain hai to aaKHir ye haal kaisa hai

zaban chup hai nazar mein sawal kaisa hai

tamam shahr mein KHushiyan luTane nikle the

tumhaare chehre pe rang-e-malal kaisa hai

chali gai hai masarrat to muskurahaT kyon

utar chuki hai nadi to ubaal kaisa hai

yahan sabhi ko sabhi se aqidaten hain bahut

qadam qadam pe ye sazish ka jal kaisa hai

kisi ne KHun ki holi agar nahin kheli

to har taraf ye lahu ka gulal kaisa hai

rafu-gari kiya karte hain nok-e-KHanjar se

hamare zaKHm ka un ko KHayal kaisa hai

qarib rahta hai karta nahin hai ram lekin

pakaD mein aata nahin wo ghazal kaisa hai

'zafar' isi ko uruj-o-zawal kahte hain

jo sar buland tha wo paemal kaisa hai