tu na ho ham-nafas agar jine ka lutf hi nahin

tū na ho ham-nafas agar jiine kā lutf hī nahīñ

jis meñ na tū sharīk ho maut hai zindagī nahīñ

ishrat-e-dīd hai yahī apnā bhī kuchh rahe na hosh

jalva ba-qaid-e-tāb-e-dīd asl meñ jalva hī nahīñ

avval-e-ishq hī meñ kyā dil kā ma.aal dekhnā

ye to hai ibtidā-e-soz aag abhī lagī nahīñ

ishq hai kaif-e-be-ḳhudī is ko ḳhudī se kyā ġharaz

jis kī fazā ho vasl o hijr ishq vo ishq hī nahīñ

ye bhī na ho ḳhabar ki sar sajde meñ hai jhukā huā

jis meñ ho bandagī kā hosh vo koī bandagī nahīñ

kis kā sar-e-niyāz thā pā-e-ayāz par jhukā

māna-e-bandagi-e-shauq satvat-e-ḳhusravī nahīñ

kar na sukūn-e-dil kā ġham hādi-e-mubtalā zarā

ishq kī bārgāh meñ dard kī kuchh kamī nahīñ

tu na ho ham-nafas agar jine ka lutf hi nahin

jis mein na tu sharik ho maut hai zindagi nahin

ishrat-e-did hai yahi apna bhi kuchh rahe na hosh

jalwa ba-qaid-e-tab-e-did asl mein jalwa hi nahin

awwal-e-ishq hi mein kya dil ka maal dekhna

ye to hai ibtida-e-soz aag abhi lagi nahin

ishq hai kaif-e-be-KHudi is ko KHudi se kya gharaz

jis ki faza ho wasl o hijr ishq wo ishq hi nahin

ye bhi na ho KHabar ki sar sajde mein hai jhuka hua

jis mein ho bandagi ka hosh wo koi bandagi nahin

kis ka sar-e-niyaz tha pa-e-ayaz par jhuka

mana-e-bandagi-e-shauq satwat-e-KHusrawi nahin

kar na sukun-e-dil ka gham hadi-e-mubtala zara

ishq ki bargah mein dard ki kuchh kami nahin