tu ne jo kuchh ki kiya mere dil-e-zar ke sath

tū ne jo kuchh ki kiyā mere dil-e-zār ke saath

aag ne bhī na kiyā vo to ḳhas-o-ḳhār ke saath

aañkh uThā kar bhī na dekhā kabhī tū ne zālim

sar paTak mar ga.e lākhoñ tirī dīvār ke saath

ye ka.ī taar haiñ vo rishta-e-jāñ hai yaksar

ġhalat us zulf kī tashbīh hai zunnār ke saath

raat din rahtī hai juuñ dīda-e-tasvīr khulī

aañkh jab se lagī us ā.ina-ruḳhsār ke saath

dekhiyo gir na paḌe diijo use ai qāsid

dil-e-betāb lipaTtā hai maiñ tūmār ke saath

kyā ajab ye hai ki vo mujh se milā rahtā hai

gul ko paivastagī lāzim hai ki ho ḳhaar ke saath

hai sazā-vār agar aise ko diije dil-o-dīñ

ham bhī dekhā use kal duur se 'bedār' ke saath

tu ne jo kuchh ki kiya mere dil-e-zar ke sath

aag ne bhi na kiya wo to KHas-o-KHar ke sath

aankh uTha kar bhi na dekha kabhi tu ne zalim

sar paTak mar gae lakhon teri diwar ke sath

ye kai tar hain wo rishta-e-jaan hai yaksar

ghalat us zulf ki tashbih hai zunnar ke sath

raat din rahti hai jun dida-e-taswir khuli

aankh jab se lagi us aaina-ruKHsar ke sath

dekhiyo gir na paDe dijo use ai qasid

dil-e-betab lipaTta hai main tumar ke sath

kya ajab ye hai ki wo mujh se mila rahta hai

gul ko paiwastagi lazim hai ki ho KHar ke sath

hai saza-war agar aise ko dije dil-o-din

hum bhi dekha use kal dur se 'bedar' ke sath