tu ne nazron ko bacha kar is tarah dekha mujhe

tū ne nazroñ ko bachā kar is tarah dekhā mujhe

kyuuñ na kar jaatā bharī mahfil meñ dil tanhā mujhe

shāḳh-dar-shāḳh ab koī DhūñDā kare patta mujhe

maiñ to ḳhud TuuTā huuñ āñdhī ne nahīñ toḌā mujhe

laġhzish-e-pā ne diyā har raah meñ dhokā mujhe

tā-dar-e-manzil tū hī ai jazb-e-dil pahuñchā mujhe

sūrat-e-ā.īna hairat se vo taktā rah gayā

ā.ina-ḳhāne meñ jis ne ġhaur se dekhā mujhe

maar hī Dālegī ik din kārobār-e-zīst meñ

tañg-dāmānī tirī ai vus.at-e-duniyā mujhe

umr-bhar miltī rahī terī adālat se na pūchh

merī nā-karda-gunāhī kī sazā kyā kyā mujhe

barg-e-gul par raqs-e-shabnam kā ye manzar ai 'ziyā'

ab to aatā hai nazar har qatre meñ dariyā mujhe

tu ne nazron ko bacha kar is tarah dekha mujhe

kyun na kar jata bhari mahfil mein dil tanha mujhe

shaKH-dar-shaKH ab koi DhunDa kare patta mujhe

main to KHud TuTa hun aandhi ne nahin toDa mujhe

laghzish-e-pa ne diya har rah mein dhoka mujhe

ta-dar-e-manzil tu hi ai jazb-e-dil pahuncha mujhe

surat-e-aina hairat se wo takta rah gaya

aaina-KHane mein jis ne ghaur se dekha mujhe

mar hi Dalegi ek din karobar-e-zist mein

tang-damani teri ai wusat-e-duniya mujhe

umr-bhar milti rahi teri adalat se na puchh

meri na-karda-gunahi ki saza kya kya mujhe

barg-e-gul par raqs-e-shabnam ka ye manzar ai 'ziya'

ab to aata hai nazar har qatre mein dariya mujhe